الاجواء المثالية للحروب العالمية ..(دليلك المصغر لفهم الحروب الكبري)

الاجواء المثالية للحروب العالمية ..(دليلك المصغر لفهم الحروب الكبري)

أزمة البشرية هي الرومانسية في التفكير فيما يجري حولها من احداث , فالتفكير الرومانسي الحالم لا ينفك بعيدا و لو للحظات عن اغلب البشرية لكي تفكر فيما يدور حولها من احداث و مواقف عالمية كبري و ازمات و اضطرابات فاغلب البشرية تنظر الي كل حدث كبير بنظرة سطحية و منفصلة تماما عن باقي الاحداث العالمية التي تقع في بلاد مختلفة , بل و تنظر اليه نظرة رومانسية عاطفية خالية من اي تفكير عقلاني مستند الي اثر تاريخي لاحداث مشابهة ادت الي احداث اضخم , لذلك تفشل البشرية دائما في رؤية المخاطر الكبري و الاحداث الجسام و التي تبدوأ وشيكة الحدوث و لكن مع رومانسية البشرية في التفكير فانها تبدوا بعيدة و لكن تحدث الصدمة و تقع تلك الاحداث مباغاته فتسبب الاثر المدمر داخل النفوس البشرية و ايضا في حياة البشرية العملية , و تلك الاخطأ تتكرر باستمرار عبر التاريخ و لست ادري أغباء هذا ام حماقة ام عمت العقول و صمت الاذان عن رؤية و فهم ما يحدث حولها و اسقاطه علي ما سبق من تاريخ للبشرية !! تكرر هذا الخطأ و تلك الكارثة مرتين متتاليتين في اخر قرنين من حياة البشرية المرة الاولي و تسببت في الحرب العالمية الاولي و المرة الثانية و تسببت في حرب اضخم و اشرس هي العالمية الثانية و يبدوا ان نفس الخطا و الخطيئة تتكرر الان بل مع مزيد من الرومانسية في التفكير مع ان التاريخ الذي سبق الحربين يتكرر الان بحذافيره امام اعين الجميع بل ومع التقدم في نقل البيانات و المعلومات و التي اصبحت في كسور من الثانية و مع زيادة المعرفة الا ان الاعين اغلقت و الاذان صمت و تحجرت العقول في رؤية وفهم ما يجري الان و مقارنته بالتاريخ السابق علي الحربين الكبريين, و نحن هنا سنحاول هنا ايضاح الاجواء السابقة للحربين الكبريين و ما سبقهما من احداث ادت الي اندلاعهما لعلنا نجد من يقرأ و يقارن ما حدث بما يحدث الان,

  الحرب العالمية الكبري 

 لا يصح النظر الي الحربين العالميتين ( الاولي و الثانية ) علي انهما حربان مختلفتين ولا يصح النظر ايضا الي ما يأتي من حروب انها منفصلة عن بعضها البعض وان لكل واحدة منها اسباب منفصلة لكن الصحيح انها حرب واحدة بدأت ثم دخلت في هدنة ثم عادت من جديد لتستكمل ما بدأته , فالحربين العالميتين الاولي و الثانية كان هدفهما الاساسي اعادة تشكيل النظام العالمي , بل و الحرب العالمية الثالثة ايضا سيكون هدفها اعادة تشكيل النظام العالمي فلا تغيير يحدث في العالم لاعادة تشكيله و شكل النظام السياسي و الاقتصادي العالمي و جوسياسيا العالم الا من خلال حرب كبري تقضي علي القوي الكبري الحالية و تعيد هيكلة ميزان القوي في العالم فتاريخ العالم يحكي هذا علي مدار القرون الطويلة , و الحروب و تغيير الانظمة العالمية هي من سنن الدفع التي وجدت بوجود الانسان ,  

خريطة القوي الكبري و التحالفات ( العالمية الاولي و الثانية ) 

 فقبل الاولي كانت هناك قوي عالمية كبري متنازعة فيما بينها و تضارب في المصالح كبير و تقاسم سلطات العالم و اقتصادياته و نزاعات متستمرة و تحالفات متشابكة للغاية ادت الي تضارب مصالح كبير و عدم وجود قوة رادعة لحل النزاعات التي كانت تنشأ باستمرار مع تضارب المصالح الاقتصادية و تواجد اكثر من اتجاه اقتصادي في وقت واحد . فكانت هناك الدولة العثمانية و روسيا القيصرية و انجلترا و فرنسا و المانيا و اليابان و الصين و امريكا, النمسا , المجر ... عدد كبير من القوي الكبري , مصالح متشابكة تحالفات غاية في التشابك و الصعوبة في الفهم فبريطانيا حليفا للدولة العثمانية و الدولة عثمانية عدوة لروسيا و روسيا حليفا لبريطانيا و فرنسا و بريطانيا يحتلون اجزاء واسعة من الدولة العثمانية و تطمع روسيا الحليفة لهما في اجزاء هي الاخر من تركة الرجل المريض و امور غاية في الصعوبة للفهم و الادراك, كيف نشأت تلك التحالفات و كيف لعدوي ان يكون حليفي و عدو عدوي يكون حليف عدوي فكان لابد من انهاء كل تلك التشابكات و التحالفات بل و القوي الكبري التي تتسبب في اضطراب القرار السياسي و الاقتصادي في العالم و ظهرت القوي الثلاث التي تريد تغيير النظام العالمي القائم ( المانيا , اليابان , امريكا ) 

  بدأت الحرب العالمية الاولي ثم انتهت و انهت الجزء الاول من هيكل النظام العالمي بسقوط

الدولة العثمانية , روسيا القيصرية , النمسا , المجر , المانيا( شبه جزئيا) و بدأت نواة القوي الكبري المشكلة للنظام العالمي تتشكل فخرجت انجلترا و فرنسا و امريكا اقوي مما دخلت الحرب من حيث الهيمنة السياسية و العسكرية عالميا لكن مازالت هناك قوي لم تنتهي تماما بل و ماتزال علي رغبتها القديمة في تغيير النظام العالمي ( المانيا و اليابان ) و من هنا تبدأ الحرب العالمية الثانية لاستكمال اعادة هيكل خريطة القوي العالمية داخل النظام العالمي الجديد هذا فيما يخص الشكل السياسي للنظام العالمي الجديد , 

  اما عن الاثار الاقتصادية الناجمة من الجزء الاول

أدّت الحرب العالمية الاولي إلى اضطراب اقتصادي هائل ناجم من انهيار ألمانيا والتكاليف البشريّة والاقتصاديّة التي منيت بها فرنسا وبريطانيا جرّاء الحرب. وتفاقم هذا الاضطراب الاقتصادي لأنّ ألمانيا لم تعد قادرة على الاستيراد والتصدير بعدما كانت قوّة تجاريّة عظمى ايضا تفاقمت الاثار الاقتصادية في فرنسا و بريطانيا بشكل رهيب فزادت ديون البلدين الناجمة من الحرب و تكاليفها مما اثر علي اقتصاديات هذه القوي ثم بدأت روسيا ثورةً زادت من اضطراب الحياة الاقتصاديّة وشرّعت الأبواب أمام حركات سياسيّة تحدّ من الاستقرار، اما الشعوب التي نجت من مذبحة الحرب العالميّة الأولى، وقعت في شرك الفشل الاقتصادي، وأمّا الأنظمة السائدة فلقيت معارضةً من الأحزاب المتطرّفة. وكان ذلك جارٍ في الصين واليابان والهند

  ما بعد الجزء الاول من الحرب ( الهدنة و التقاط الانفاس ) 

تسبب الجزء الاول من الحرب الكبري ( العالمية الاولي ) في اعادة هيكلة جزئية للنظام العالمي و تغيير جزئي في خريطة التحالفات العالمية و مسار الاقتصاد العالمي , لكن الامور لم تحسم بعد و مازال هنا تقاسم للسطلة العالمية ما بين فرنسا و بريطانيا و امريكا و هناك قوي صاعدة اخري تريد الهيمنة مثل المانيا و اليابان فكان لابد من استكمال الحرب مرة اخري لانهاء تلك الزحمة الشديدة في القوي العالمية و ايضا مازالت الاثارة الاقتصادية الكارثية للجزء الاول لم تحل بعد بل و زادت حدة الازمات الاقتصادية حتي وصلت الي مرحلة ضخمة غير مسبوقة في تاريخ البشرية و حدث الكساد العالمي العظيم في 1929 و الذي اطاح بملايين الوظائف و افقر ملايين الافراد و انهارت معه اقتصاديات العالم فكان لابد من جزء ثاني لاصلاح ما نجم عن الجزء الاول سياسيا و اقتصاديا 

وانطلق الجزء الثاني من الحرب و الذي فيه حدث 

تدمير المانيا و اليابان تماما صعود الاتحاد السوفيتي عوضا عن روسيا القيصرية , اضعاف بريطانيا و فرنسا و خروج الكثير من المستعمرات البريطانية من قبضتها استبدال فرنسا و انجلترا في الشرق الاوسط ب امريكا مع مناوشات من السوفيت للسيطرة علي بعض الدول الشرق الاوسطية الا انها لم تستمر كثيرا و انتهت تماما في مطلع السبعينات من القرن العشرين ارتفاع اسهم امريكا والاتحاد السوفيتي لاقتسام السلطة العالمية كبديل لكل القوي السابقة المنتصرة في الحرب الاولي( بريطانيا , فرنسا ) تشكل نواة النظام العالمي ذو القطبين الكبيرين ( امريكا و السوفيت ) تشكيل معسكرين ( الكتلة الشرقية بقيادة السوفيت ( حلف وارسو ) و الكتلة الغربية بقيادة امريكا ( حلف الناتو ) استقرار الامر كذلك حتي مطلع التسعينات ثم سقوط الاتحاد السوفيتي و هيمنة امريكية مطلقة علي النظام العالمي و من ثم اعادة هيكلة النظام سياسيا و اقتصاديا سياسيا تفكيك حلف وارسو و انهاءالكتلة الشرقية تماما و تفرد حلف الناتو بالقوة المطلقة عالميا فرض خريطة التحالفات السياسية و العسكرية و الاقتصادية الموالية لامريكا اما دون ذلك فهو دولة مارقة معادية للنظام العالمي اقتصاديا : فرض النظام الرأسمالي علي اقتصاد العالم ككل و دحر الاقتصاديات الاشتراكية , سيطرة القطاع الخاص علي السوق العالمي , سيطرة الشركات العابرة للقارات علي اقتصاد العالم و التي مقرها في اغلب الاحيانا امريكا

 , التمهيد للجزء الثالث 

مما سبق في الجزئين الاول و الثاني تستنتج عدة نقاط وجود نظام عالمي قديم يراد تحديثه صعود قوي جديدة عالمية تريد اقتسام السلطة فشل و انهيار اقتصادي عالمي يدفع الي حرب كبري لحل المعضلات الاقتصادية فشل الحكومات الحالية في كل العالم في حل مشاكل الدول الاقتصادية صعود القوي اليمينة المتطرفة كرد فعل علي فشل الحكومات في قيادة الدول و رغبة منها في انهاء الارتباط بنظام عالمي موحد تري انه السبب الاساسي في ازماتها الاقتصادية و فشل الدول في تجاوزها ... كان هذا هو شرح مبسط و سريع و مختزل جدا لاسباب الحرب العالمية الاولي و الثانية و ايضا التمهيد للثالثة و في مقال قادم سنتعرض التمهيد للجزء الثالث من الحرب العالمية و هذا في مقال منفصل منعا للممل و اعطاء فرصة في المقال الجديد للاسهاب في التفاصيل لتوضيح الصورة

الطريق الي عملة عالمية موحدة | رؤى (مولانا العارف) بقلم (محمود فوزي)

الطريق الي عملة عالمية موحدة | رؤى (مولانا العارف) بقلم (محمود فوزي) بداية النقود في العالم قبل بداية النقود عالميا كان أسلوب التعامل بالمقايضة (سلعة أو خدمة مقابل سلعة أو خدمة). ومن هنا جت الألشة السخيفة بتاعة "إنت حالق برغيف وبيضيتين". بعد كدة حصلت المشكلة، إن شخص لا يملك سلعة أو خدمة ومحتاج سلعة، فبدأ التفكير والاتفاق على شيء له قيمة يتم تحويله لعملة.. وبما أن العالم قديما كان قايم على الرعي والزراعة قبل اكتشاف المعادن، تم اتفاق علي اتخاذ الأغنام كعملة مبادلة، والطريف هنا إن كلمة نقد أصلها نقدي، وهو أحد أنواع الأغنام ذات الأرجل القصيرة. المهم، اكتشف الإنسان المعادن، وبدأ في صك العملة من النحاس وبعدين الفضة، لحد ما وصل للذهب، فصك الذهب كعملة وبدأ التعامل به. كثر الذهب في أيدي التجار والأمراء، فبدأت الحاجة لتخزينه.. من هنا جت فكرة بيوت المال. الصكوك وبيوت الأموال بدأ الناس يحفظوا الذهب في مكان آمن مقابل صك - ورقة بقيمة الذهب - ووقت ما يحبوا يستردوه، يسلّموا الورقة أو جزء منها للقائمين على المكان الآمن دة، وياخدوا ذهبهم أو جزء منه.. طبعا مكنش فيه مشاريع عملاقة زي دلوقتي، ولا بنية تحتية. المهم بدأت النقود والسبائك الذهبية تتكدس في بيوت المال - طبعا مش محتاجة نقول مين هم أصحاب بيوت المال.. معروفة يعني. يسكت بقي البني آدم ويرضى بقليله، أو يرضى بالمكسب اللي كان بياخده نتيجة حفظ الأموال دي؟؟ لا طبعا يسكت إزاي وهو عنده حلم عاوز يحققه نتيجة شعوره بالاضطهاد العالمي له، وإنه ملوش دولة ولا شعب ولا أرض، ومحكوم عليه بالشتات. يقوم بقي يعمل إيه؟! بداية البنوك وإصدار العملات الورقية صاحبنا بيقولك ما الناس مبتستردش ذهبها مرة واحدة طب ما أنا أستفيد بيه، وهوب هوب هوب بقى يسلّف الذهب ده للي محتاجينه مقابل فايدة، سمّيها فايدة.. ومن هنا أصبح بيكسب من الهوا؛ فلوس من المودعين، وفلوس من المستلفين، وبقى غني، والبلية لعبت معاه. كنا غمزنا ولمزنا باسم أصحاب بيوت المال؛ مين هم؟! وقولنا من شوية سميها فايدة.... لكن طبعا هنضطر نقول مين هم أصحاب بيوت المال، ومعنى فايدة الحقيقي إيه!! الشرائع السماوية كلها بتحرم الربا، لكن في شريعة اليهود(المتحرفة طبعا) يجوز إقراض غير اليهودي بالربا، أما المسيحية والإسلام فلا يجوز العمل بالربا نهائيا حتي للأغيار. لذلك، امتلك اليهود بيوت المال، وطبعا خلاص عرفنا إن الفايدة اسمها ربا. ولكم في قصة تاجر البندقية "شيلوك" المثل. بعد كدة، بدأت فكرة إنشاء البنك باسمه ووظيفته الحالية، ومن ثَمَّ إصدار ورقة ضمان بقيمة الذهب اللي فيه، وتم التقسيم.. نقول مثال: قطعة ذهب واحدة تساوي صك أو ورقة فئة واحد (1)، وهكذا.. الورقة دي اتسمّت بنك \ نوت، ومنها كلمة البنكنوت. من هنا بدأت العملة في الصدور، وطبعا من أول يوم العملة دي لا تمثل القيمة الحقيقة للغطاء الذهبي اللي في البنك.. وطالما دخلت اللعبة يبقى لازم تكمل لحد الآخر، ومن هنا بدأت السيطرة على فلوس الناس والتحكم فيهم. إزاي سيطر أصحاب المصارف (البنوك) على ذهب العالم؟! خلاص عرفنا العملة والبنك جُم منين، نخش بقى على المرحلة اللي بعدها.. إحنا كل دة بنتكلم عن ذهب مملوك لأفراد، وبنوك على قدها بتسيطر على أشخاص.. طب عاوزين نوسع القاعدة، ونسيطر على دول بقى وشعوب، وزيط يا دود وزيّطني معاك. البنوك بدأت اللعبة الكبيرة، بإنها تموّل الدول - طبعا مكنش فيه حكومات زمان، كان ملك بس - فبدأت تمويل الملك فيما يحقق له أغراضه الملكية في التوسع، وإقامة دولته العظيمة، وتحقيق أحلامه الإمبراطورية. أشهر مثل في التاريخ كان "نابليون بونابارت"، ودة يُعتبر أكبر – لا مؤاخذة - حمار تم ركوبه.. بدأت البنوك في تمويل حروب نابليون (الحروب النابليونية) زي ما هتشوف في الرابط دة عم نابليون خلاص دخل الحرب، وبعد كل حرب، حرب.. مع كل حرب بيخوضها صاحبنا بيكون عاوز فلوس.. هوب.. خش البنك إديلُه فلوس.. هوب ديونه كترت.. هوب إدينا دهب من اللي سرقته وانت بتنهب الدول اللي دخلتها... من هنا بدأ السيطرة علي ذهب أوروبا. خُش على ذهب آسيا، ودة بقى عن طريق بريطانيا.. هوب تمويل حملات بريطانيا على الهند. احتلال الهند وإقامة شركة الهند الشرقية - وما أدراك ما شركة الهند الشرقية - ودورها في تصدير الأفيون للصين مقابل الذهب بتاعها، ولما حصلت ثورات الأفيون الأولى والتانية تدخلت بريطانيا عسكريا في الصين... ادخل هنا اقرأ عن حروب الأفيون من هنا تم الاستيلاء على ذهب الصين، ومن وراه ذهب آسيا.. فاضل إفريقيا وذهبها، وطبعا مش محتاجة نضرب أمثلة باللي حصل زمان، لأنه لحد اللحظة بيحصل، وأبسط مثال هو اللي بيحصل في مالي لحد اللحظة. خلاص استولينا على ذهب الأفراد ومن بعده ذهب الدول؟! ندخل بقى المرحلة الجديدة، وهي اعتماد الذهب كغطاء لإصدار العملة. الذهب كغطاء نقدي العنوان اللي فوق معناه إنك كدولة متقدرش تطبع جنيه أو ليرة أو دولار أو روبية أو ريال واحد من غير ما يكون متغطي بذهب في البنك المركزي بتاعك. الموضوع دة تم إقراره في مؤتمر باريس سنة 1867م اللي فيه اعتُمد الذهب كغطاء لإصدار العملة بشكل رسمي وعلى نطاق عالمي. جميل، طب كدة الدول محتاجة تصدر عملة ومعندهاش ذهب كفاية.. تعمل إيه؟ بالظبط.. تروح تقترض ذهب من بيوت المال الكبيرة، اللي هي البنوك المسيطرة على الذهب العالمي، وطبعا هتقترض الذهب بفايدة.. من هنا عرفنا عن أول نواة للسيطرة على البنوك المركزية في الدول.. طب في مؤتمر باريس فيه دول وافقت ودول لا.. مش مشكلة، اللي موافقش بمزاجه هيوافق غصب عنه، و طبعا اللي وافقوا هم القوى الكبرى، ومن هنا تم إطلاق أيديهم لاستعمار الدول الأخرى وإخضاعها لسيطرة بنوك الذهب... (افتكر الجملة دي علشان هتشوفها كمان شوية، واتقل تاخد حاجة نضيفة). وقد كان ماسبق، الدول سمعت الكلام وتم عقد مؤتمر جنوة 1922م، و خد بالك.. دة كان بعد الحرب العالمية الأولى.. إيه دة؟! يعني علشان أسيطر علي الذهب أروح أعمل حروب ؟!!! آه عادي... (وبردو افتكر الجملة دي علشان راجعين لها تاني). وقّعت على الاتفاق دول اكتر.. طب إيه.. خلصت الحدوتة على كده؟ لا طبعا، المشوار طويل والرجالة عاوزة سيطرة أكبر.. نقوم رايحين أمريكا ونسيطر علي الذهب بتاعها ازاي؟!! يُصدر روزفلت قانون سنة 1933م، يُلزم الأمريكان بتسليم الذهب اللي معاهم للبنك الفيدرالي اللي اتعمل سنة 1913م (ودة بنك خاص ركز معايا في خاص دي)، بقيمة 20 دولار للأونصة، ويبدل الذهب اللي في إيد الناس بشوية ورق، بعدها يرتفع سعر الدهب و يبقي ب 35 دولار للأونصة، ويقل الدولار اللي في أيديهم بقيمة النصف... يللا بالشفا ما علينا.. هوب هوب هوب.. تقوم الحرب العالمية التانية، وبعدها ييجي مؤتمر بريتون وودز سنة 1944م، ويقرر العالم جعل الدولار سيد العملات... بعدين تبتدي الدول كلها تسلم أمريكا الذهب بتاعها، علشان أمريكا تطبع دولارات متغطية بالذهب.. بكدة يبقى نقلنا الذهب اللي جمعناه على مدار سنين من البشر والدول، و نسلمه لأمريكا.. ليه أمريكا تحديدا؟!!! هقولك بعدين، ولا أقولك؟؟ انت هتعرف لوحدك. خلاص بقى.. الدولار هو العملة العالمية دلوقتي أهو، ومتغطي بالذهب.. فرنسا عاوزة دولارات؟! تروح تسلّم أمريكا ما يعادلها ذهب، وكذلك دول العالم.. هوووب.. تدخل أمريكا حرب كدة غريبة قوي، اسمها حرب فيتنام، فأصبحت محتاجة دولارات تموّل الحرب!! تطبع؟ لا طبعا، مفيش ذهب كفاية.. فتروح مغفّلة العالم كله، وتطبع دولارات كتيرة تصرف منها على الحرب بقي، ولما العالم يبتدي يشم خبر، يقوم النجم "نيكسون" يعمل رقصة الوداع، ويقرر فصل الدولار عن الذهب، فيطبع دولارات بدون غطاء ذهبي فيما يسمى ب"صدمة نيكسون". خلاص كدة، الذهب اتحرر من قيود الدولار، وهيرجع النجم تاني والدولار هيبقي بالكيلو؟! انت غلبان قوي.. فيه رجالة تاكل الزلط ورا الدولار يا عم انت.. أولهم الملك "فيصل" لما هووب راح موقّع اتفاقية البترودولار سنة 1974م، وربط البترول بالدولار، وقال مفيش لتر بترول فيكي يا منطقة يتباع من غير الأخضر.. المهم الله يرحمه "فيصل" كان فاكر إن كدة هيراضي أمريكا بعد حركة قطع البترول عنها في حرب 73.. بس الحركة ردت في صدره قتلته زي سماح الله يرحمها، وجه ابن أخوه اللي قالوا عليه مجنون من أمريكا قبلها ب 3 أيام وقتله.. دة علشان متتكررش تاني، وتبقي درس لأي حد يفكر فيما بعد يلعب معاهم.. بعد كدة في 1976م حصل مؤتمر جامايكا - مش بتاع الخالة نوسة.. لا لا.. دة التاني - ويقرروا فيه إن الذهب يبقى سلعة للعرض والطلب، وزي ما السوق يقول سعره.. ويسود الدولار العالم مرة أخرى، لكن بغطاء البترول.. وابقوا اعملوا الذهب غوايش وشبكة. السيطرة و هنا ترجع البنوك المركزية تاني تحت سيطرة الدولار، زي ما كانت زمان تحت سيطرة الذهب، واللي كان يملك الذهب كان يملك التحكم فيها.. دلوقتي اتسلمت الراية للي يملك الدولار.. وطبعا هتقول هنا أمريكا!! يا عم أساسا ماكينة طبع الدولار مش مع أمريكا، دي مع البنك الفيدرالي، اللي هو ملكية خالصة خاصة لمجموعة أفراد.. ايه ده؟! يعني كدة البنوك المركزية في العالم كله تحت إيد مجموعة أفراد مش دولة؟ آه والله يا عمنا زيمبؤلك كدة.. حاول بقى تعرف مين مُلّاك بنك الاحتياطي الفيدرالي الأمريكي وانت تعرف مين بيحكم الاقتصاد والسياسة النقدية لبلدك.. في بريتون وودز تم تأسيس البنك الدولي (شيطان الافلاس)، وبدأ السيطرة على اقتصاد العالم بطريقتين: الأولى هي أمريكا وإقراضها للدول، وبعدين إرسال شركاتها تلم اللي تم إقراضه في صورة مشروعات. والتانية هي البنك الدولي وصندوق النقد الدولي، وإقراضهم للدول وإفقارها، والسيطرة على سياساتها الاقتصادية، ومن ثَمَّ شعوبها.. ومش محتاجين نقول مين أكبر مساهمين في البنك والصندوق يا محمد.. وبكدة يبقى حطينا العالم في جيبنا الصغير، وطبعا من يملك الاقتصاد والمال، يملك الحكام التي تملك الشعوب وتسيرها بحسب رغبة مالك المال.. كدة فاضل آخر خطوة، وهي إصدار عملة عالمية واحدة، وأظن بالتسلسل دة وقتها قريب جدا.. ما احنا خلينا الذهب سيد، وهو سيد فعلا لأنه معدن وله قيمة، بس كان بيكلفنا كتير قوي؛ تنقيب وتوضيب وسبك ونقل، فتعبنا بقى.. بعدين روحنا بدلناه بالدولار، اللي هو حبر على ورق لا أكتر ولا أقل، بس بردو مربوط بالبترول، وحاجة براميل وسفن ونيلة.. وبعدين روحنا مجمعينه وحاطينه في ورق أقل، وسميناها سندات وقروض، وحطينا فلوس العالم كله فيها.. فمش فاضل غير إننا نقول خلاص... إحنا ملكنا فلوس الأرض، ومحتاجين نصدر عملة بتاعتنا موحدة.. العالم كله يستخدمها مقال منشور علي مدونة حكايات جوكر بتاريخ 4 ابريل 2020

اللاوعي وأثره في تشكيل الوعي | رؤى (مولانا العارف) - بقلم محمود فوزي

اللاوعي وأثره في تشكيل الوعي | رؤى (مولانا العارف) - بقلم محمود فوزي "اللاوعي" باختصار شديد، هو طريقة تقدر تثبّت أفكار ومعتقدات كتير داخل الشخص والمجتمع.. ودة بييجي بالتدريج في صورة رسائل غير مباشرة، حتي لا يُدركها الوعي فيرفضها، ودة اللي لعب عليه الشيطان مع البشر في زرع أفكار فاسدة بالتدريج كبرت وأصبحت عقائد، ومن ثَمَّ دين يُقاتل الإنسان من أجله. نفس الفكرة استخدمتها الميديا العالمية في ترسيخ مفاهيم داخل اللاوعي بالتدريج، حتي أصبحت مقبولة وأصبحت تُشكّل العقل والوعي المجتمعي.. أبسطها كان كفاحها الطويل من أجل حقوق المِثْلِيِّين، واللي اشتَغَلِت عليها بالتدريج لحد ما تم إقرار الحقوق دي في مجتمعات كتيرة، وبكدة أصبحت من الأمور المُتَقَبَّلة. أنا ضربت المَثَل بحقوق المِثليين لأنه أشهر وأقرب مَثَل مُشاهَد بالعين حاليا داخل أغلب المجتمعات سواء كانت عربية أو غربية، وعلى الرغم إن لسة فيه رفض للحقوق دي، لكن الرفض دة دون مقاومة حقيقية عن طريق قوانين تمنعه.. أيضا مقاومته بدأت تضعف جدا نتيجة الضغط العالمي القوي لقبوله. من المثال دة تقدر تشوف مَدَى قوة الميديا العالمية وتأثيرها سياسيا واقتصاديا واجتماعيا على العالم أجمع.. الميديا أصبحت الوسيلة الوحيدة تقريبا اللي بيتم تشكيل الوعي المجتمعي وأنماط السلوك الاجتماعي للشعوب بها.. لذلك أصبحت ملك مجموعات صغيرة جدا، عن طريق الاتحاد، أو صفقات الاستحواذ بين المؤسسات الكبرى العاملة في المجال الإعلامي.. المجموعة المالكة للميديا العالمية مش هتتجاوز ١٠ أفراد في تقديري - أشهرهم روبرت ميردوخ ومايكل بلومبيرج ومارك زوكربيرج ولاري بيج وجيف بيزوس وتوني هول.. دول غير الصاعدين بسرعة الصاروخ مارك راندولف وريد هاستنجز مُلَّاك نتفلكس.. علشان تتكلم عن حجم الاستثمار في الميديا قد إيه، وحجم المكاسب...... إلخ، فإنت محتاج مجلد بحجم ٧٠٠ صفحة ودة مش موضوعنا.. موضوعنا الأساسي هو تأثير الميديا العالمية في تشكيل الوعي المجتمعي .. هتلاقي أفكار اتشكّلت داخل لاوعي الإنسان، وهنضرب مثال بالإنسان العربي.. هتلاقي نظرته للإنسان الغربي (الرجل الأبيض) تحوّلت ١٨٠ درجة، يعني كانت في فترة استعمار الغرب للدول العربية نظرة لشخص معتدي، محتل، لص، قاتل جاي ياخد خير الدول ويستعبدها، ثُم تحولت إلى أنه النموذج الراقي، المتحضر، المثقف، الإنسان. ودة كله بسبب ضغط الميديا لإظهار صورة مغايرة للحقيقة والتاريخ.. على الرغم من إن سلوك الرجل الأبيض من استعمار الشعوب ومص دمها لم يتغير، وإنما تغيرت الطريقة، من احتلال بقوة السلاح إلى احتلال اقتصادي وثقافي.. لاحظ دور الميديا هنا لما حوّلت المشهد الحقيقي لعكسه تماما، فترسّخ دة في أذهان الكثير من العرب، وطبعا مش عاوز أقول كمية الانبهار بالرجل الأبيض عاملة إزاي، من طريقة تقليد لبسه وكلامه، وصولا لسلوكه المجتمعي، واللي أصبح الرُقي والتحضُّر مرهونين بتقليده وقبول أفكاره، حتى وإن كانت مخالفة للمعتقد الديني. المهم إن تشكيل الوعي والثقافة، حتى الأنماط الاستهلاكية والاقتصادية.... إلخ، وصولا للمعتقد الديني، أصبح يتشكّل عن طريق الميديا العالمية، واللي هي الأداة الأقوى في نظري.. أقوى من السلاح النووي أو الاقتصاد في تغيير المجتمعات والشعوب وحكم الدول أيضا. ده تمهيد كدة مبدئي، لأن الموضوع أطول وأخطر من إنه يتكتب فيه مرة واحدة، لأن الكلام عن الميديا العالمية و تأثيرها في نظري من أهم المواضيع اللي محتاجة يتكتب فيها بشكل دوري مستمر. مقال منشور علي مدونة حكايات جوكر بتاريخ 14 مارس 2020

أسلحة النظام العالمي الجديد كما رآها نعوم تشومسكي

أسلحة النظام العالمي الجديد كما رآها نعوم تشومسكي | رؤى (مولانا العارف)

أسلحة النظام العالمي الصامتة نظرية الأسلحة الصامتة للحروب الهادئة؛ وهي سلاح ال NOW.. إنها من أشرس الأسلحة، وأخطرها على الإطلاق.. البداية؛ وثيقة سرية تم الكشف عنها سنة 1979.. هذه الوثيقة تتحدث عن كيفية السيطرة على الشعوب، والأسلوب الأمثل للسيطرة والتحكم فيها، بناءً على علم الهندسة الاجتماعية، أو إدارة المجتمعات (هندسة أنظمة الإدارة المجتمعية).. لقد تم الكشف عن هذه الأسلحة بطريق الخطأ، ثم تسربت من شركة IBM.. ودة أمر غريب جدا؛ إن وثيقة زي دي تكون موجودة في شركة حاسوب.. الطبيعي هو تواجدها في أروِقة منظمات الإدارة، أو المعاهد السياسية المختصة بالشأن الاجتماعي.. لكن الوثيقة وُجدت في (آي بي إم)؛ ودة أمر غريب، مش هنقف قدامه كتير. اقرأ عن اللاوعي وأثره في تشكيل الوعي - بقلم مولانا العارف نرجع للوثيقة؛ واللي تلقَّفها "نعوم تشومسكي" بالتحليل والترتيب، وخرج منها بعشر عناصر أساسية.. الغريب في الأمر؛ إن ال 10 نقاط دول لو بصيت عليهم داخل كل دولة أو مجتمع؛ هتلاقيهم بيتم تطبيقهم حرفيا؛ بلا خروج على النص، وبطريقة مذهلة لا مثيل لها.. ومُلاحظ إن اللي كتب الوثيقة هم مجموعة من أبرع المفكرين والمخططين في كافة المجالات؛ سياسية – اجتماعية – اقتصادية – إلخ... الوثيقة دي عمل جبار وضخم جدا، ويُعتبر دستور السيطرة والتحكم الفعلي في كافة شعوب العالم.. لكن التطبيق بيختلف بحسب طبيعة الشعوب، واقتصاديتها، ودينها، وتكوينها المجتمعي.. طبعا مش هنتكهن مين اللي كتبها واشتغل عليها؛ لأنه شيء بديهي ومعروف.. فيما يلي عرض للنقاط العشر؛ مع تعليق بسيط، أو هامش حطيته على كل بند... الهامش دة كلمة، أو جملة.. لكن فعلا لو بصّيت عليها؛ هتلاقيها حرفيا داخل الاستراتيجية دي.. 1 استراتيجية الإلهاء والتسلية (الإعلام والقبض على فتيات تيك توك) حافظوا على اهتمام الرأي العام بعيدا عن المشاكل الاجتماعية الحقيقية.. اجعلوه مفتونا بمسائل لا أهمية حقيقية لها.. أبقوا الجمهور مشغولا؛ مشغولا؛ مشغولا.. لا وقت لديه للتفكير، وعليه العودة إلى المزرعة مع غيره من الحيوانات. اقرأ عن تأثير مسلسل La Casa De Pabel وفيلم الجوكر على الفوضى القادمة - بقلم مولانا العارف 2 استراتيجيّة افتعال الأزمات والمشاكل وتقديم الحلول (سيناء والطوارئ) انتزاع ردود الفعل من الجمهور؛ بحيث يندفع الجمهور طالبا لحل يرضيه... على سبيل المثال: السّماح بانتشار العنف في المناطق الحضرية، أو تنظيم هجمات دموية.. هنا تصبح قوانين الأمن العام مطلوبة حتّى على حساب الحرية.. أو: خلق أزمة اقتصادية؛ يصبح الخروج منها مشروطا بقبول الحدّ الأدنى من الحقوق الاجتماعية، مع تفكيك الخدمات العامّة، ويتمّ تقديم تلك الحلول المُبرمجة مسبقا، ومن ثَمّ؛ قبولها على أنّها شرّ لا بدّ منه. 3 استراتيجية التدرّج (رفع الدعم عن الكهرباء والغاز والبنزين..... إلخ) لضمان قبول ما لا يمكن قبوله؛ يكفي أن يتمّ تطبيقه تدريجيّا على مدى 10 سنوات.. بهذه الطريقة فُرِضت ظروف اقتصاديّة واجتماعيّة مثّلت تحوّلا جذريّا؛ كالنيوليبراليّة وما صاحبها من معدلات البطالة الهائلة والهشاشة والمرونة... العديد من التغييرات التي كانت ستتسبّب في ثورة إذا ما طُبِّقت بشكل وحشيّ؛ يتمّ تمريرها تدريجيّا، وعلى مراحل. 4 استراتيجية التأجيل (سد النهضة) هناك طريقة أخرى لتمرير قرار لا يحظى بشعبية؛ هو تقديمه باعتباره (قرار مؤلم ولكنّه ضروريّ).. ثم السّعي إلى الحصول على موافقة الجمهور لتطبيق هذا القرار في المستقبل... دة لأنّه من الأسهل دائما قبول القيام بالتضحية في المستقبل عوض التضحية في الحاضر... ولأنّ الجهد المطلوب لتخطّي الأمر لن يكون على الفور... ثم لأنّ الجمهور لا يزال يميل إلى الاعتقاد بسذاجة أنّ (كلّ شيء سيكون أفضل غدا)... وهو ما قد يمكّن من تجنّب التضحية المطلوبة... وأخيرا؛ فإنّ الوقت سيسمح ليعتاد الجمهور فكرة التغيير، فيقبل الأمر طائعا عندما يحين الوقت. 5 مخاطبة الجمهور على أنّهم قُصَّر أو أطفال في سنّ ما قبل البلوغ (مصر غير مستعدة للديمقراطية) معظم الإعلانات الموجّهة للجمهور العريض تتوسّل خطابا وحججا وشخصيات، أسلوبا خاصّا يوحي في كثير من الأحيان أنّ المشاهد طفل في سنّ الرضاعة أو أنّه يعاني إعاقة عقلية... كلّما كان الهدف تضليل المشاهد؛ إلاّ وتمّ اعتماد لغة صبيانية... لماذا؟.. "إذا خاطبت شخصا كما لو كان في سنّ 12، عند ذلك ستوحي إليه أنّه كذلك، وهناك احتمال أن تكون إجابته أو ردّ فعله العفوي كشخص في سنّ 12"... مقتطفات من دليل (الأسلحة الصّامتة لخوض حرب هادئة). 6 مخاطبة العاطفة بدل العقل (شيوخ العار والوطنية المزيفة) التوجّه إلى العواطف هو الأسلوب الكلاسيكي لتجاوز التحليل العقلاني.. وبالتالي قتل مَلَكَة النقد.. بالإضافة إلى أنّ استخدام السجل العاطفي يفتح الباب أمام اللاوعي، ويعطّل ملكة التفكير، ويثير الرّغبات أو المخاوف والانفعالات. من هم المحافظون الجدد؟ وكيف يحكمون العالم؟ 7 إغراق الجمهور في الجهل والغباء (التابلت ونظم التعليم الجديدة) لابدّ من إبقاء الجمهور غير قادر على فهم التقنيات والأساليب المستعملة؛ من أجل السيطرة عليه واستعباده (يجب أن تكون نوعية التعليم الذي يتوفّر للمستويات التعليميّة الدنيا سطحيّا؛ بحيث تحافظ على الفجوة التي تفصل بين النخبة والعامّة، وأن تبقى أسباب الفجوة مجهولة لدى المستويات الدنيا"... مقتطفات من وثيقة (الأسلحة الصامتة لخوض حرب هادئة). 8 تشجيع الجمهور على استحسان الرداءة (عود البطل وبنت الجيران) تشجيع العامّة على أن تنظر بعين الرضا إلى كونهم أغبياء ومبتذلين وغير متعلّمين. 9 تحويل مشاعر التمرّد إلى إحساس بالذّنب (سباب ولعن 25 يناير) دفع كلّ فرد في المجتمع إلى الاعتقاد بأنّه هو المسؤول الوحيد عن تعاسته، وذلك بسبب محدوديّة ذكائه، وضعف قدرته أو جهوده.. وهكذا؛ بدلا من أن يثور على النظام الاقتصادي، يحطّ الفرد من ذاته، ويغرق نفسه في الشّعور بالذنب؛ ممّا يخلق لديه حالة اكتئاب تؤثر سلبا على النشاط... ودون نشاط أو فاعليّة؛ لا تتحققّ الثورة. 10 معرفة الأفراد أكثر من معرفتهم لذواتهم (الميديا والتطبيقات) على مدى السنوات ال 50 الماضية، نتج عن التقدّم السّريع في العلوم اتّساع للفجوة بين معارف العامة وتلك التي تملكها و تستخدمها النُّخب الحاكمة... فمع علم الأعصاب وعلم الأحياء وعلم النفس التطبيقي، وصل "النظام العالمي" إلى معرفة متقدّمة عن الإنسان؛ سواء عضويّا، أو نفسيا... لقد تمكّن "النظام" من معرفة الأفراد أكثر من معرفتهم لذواتهم... وهذا يعني أنه في معظم الحالات يسيطر "النظام" على الأشخاص ويتحكّم فيهم أكثر من سيطرتهم على أنفسهم. مقال منشور علي مدونة حكايات جوكر بتاريخ 8 يوليو 2020 https://www.jokertales.com/2020/07/nwo-weapons-mawlana.html

(لا شيء بالصدفة) البجعة السوداء ومخططات اليمين المتطرف للصراعات القادمة

(لا شيء بالصدفة) البجعة السوداء ومخططات اليمين المتطرف للصراعات القادمة | رؤى (مولانا العارف) بقلم (محمود فوزي)

‏يقول "نسيم طالب" في كتابه (البجعة السوداء - تداعيات الأحداث غير المتوقعة) : "لقد رسخ في أذهان البشر علي مدار مئات السنين، أن كل البجع أبيض، حتى تم اكتشاف البجع الأسود في أستراليا.. فكان لهذا الحدث أثره الخطير في التأكيد على محدودية معارف البشر المستقاة من الملاحظات والتجربة، ‏كما تشير إلى مبلغ هشاشة البشر الإدراكية عن الأشياء والأمور". فمجرد مشاهدة بجعة سوداء واحدة، كان كفيلا بالإطاحة بمصداقية مفهوم ترسّخ عبر مئات السنين، ناتج عن المشاهدات والملاحظات المُشاهَدة بالعين والتجربة.. و على ذلك، يمكن القول بأن (البجعة السوداء) هي حدث كان له تبعات ثلاثة : 1- عرضية؛ أي أنّها تقع خارج نطاق التوقّعات المألوفة، حيث أنه لا شيء في الماضي كان يشير إلي حدوثها. 2- تتضمن تأثير بالغ الشدة. 3- على الرغم من كونها عرضية، إلا أن طبيعتنا البشرية تجعلنا ننسج لها تفسيرات بعد حدوثها. ‏ من أمثلة البجعة السوداء الحالية التي توضح النظرية : - التصويت البريطاني على الخروج من الاتحاد الأوروبي (البريكست). - فوز ترامب برئاسة الولايات المتحدة. ‏تسطيع نظرية البجعة السوداء تفسير الكثير من الأحداث التي وقعت، وكان توقع حدوثها بعيد عن الأذهان بمسافات كبيرة جدا، وتحديدا الأحداث التي تقع بشكل مفاجئ ويكون لها أثر كبير مدوي. ‏هنا ينط السؤال قدام عينينا : الأحداث اللي بتحصل بشكل مفاجئ، بدون ما الناس تكون متوقعاها.. هل الأحداث دي بتحصل صدفة ؟ ولا بيكون فيه مخططات لحدوثها ؟! للإجابة على السؤال دة، لازم أولا نشوف ما هو متاح، وما هو غير متاح للبشر الوصول إليه من معلومات.. ‏وأنا بدوّر عن المتاح والغير متاح للبشر من المعلومات، لفت انتباهي موضوع ال Dark Web & Deep Web، وإزاي المحتوى المعلوماتي عليهم بالنسبة للمحتوى المطروح على محركات البحث زي جوجل وياهو واوبرا بيمثل نسبة ضئيلة جدا من محتوى الإنترنت. أيوة، المتاح على محركات البحث دي يساوي ٦٪ من محتوى الإنترنت ككل، وال ٩٤٪ موجودين في ال Deep & Dark Web. ‏بدأ السؤال يطرح نفسه : ليه المتاح من محتوى الإنترنت للناس العاديين يساوي ٦٪ بس من محتوى الإنترنت ككل ؟؟ و ليه علشان تدخل Deep Web & Dark Web محتاج تحصين خاص من الاختراق، وبرامج خاصة ومحركات بحث خاصة زي TOR مثلا وهو الأشهر ؟!! ‏ليه حتى ال VPN مبيفتحش ال Deep & Dark Web، ولازم البرامج الخاصة ؟! وليه بيتم حجب الكم الضخم من محتوى الإنترنت بالشكل ده ؟؟ طبعا الفكرة السائدة عن ال Dark Web & Deep Web أنهم للمخدرات والسلاح والجنس بس. و دة طبعا كلام مغلوط، لأن زي ما موجود الحاجات دي، بردو موجود مواقع وكتب وأبحاث مهمة وضخمة. ‏المهم،،، إحنا محتاجين الإجابة على الأسئلة دي. بردو من الأمور اللي أغلب المهتمين عارفينها، كتير من المعلومات تم حجبها قبل حتى ظهور الإنترنت. أمهات الكتب العلمية والدينية والتاريخية كلها ممنوع طباعتها، اللهم إلا النذر اليسير جدا.. الكتب دي أغلبها محفوظ في أماكن محظور الدخول لها أبدا زي مكتبة الفاتيكان مثلا. ‏وأغلب بل كل الوثائق التاريخية المهمة كلها محجوبة عن العامة أو حتى الخواص، بل موجودة بين أيدي مجموعات بشرية خاصة جدا، تكاد تكون أقرب للتوريث ؟! الأسئلة كتيرة، والإجابات أغلبها ممكن ميكونش منطقي (بمنطق العقل البشري اللي اتربينا عليه)، وأغلبها هيروح ناحية نظريات المؤامرة اللي هي حقيقية بالمناسبة. ‏الخبر اللي في الصورة أعلاه بردو يخليك تسأل ليه هيتم دة، وهل دة خطوة مسبقة لإخفاء المحتوى المعلوماتي حتى لو غير دقيق ؟ أظن هو خطوة أولية لإنهاء تواجد أي معلومات متاحة لنا غير اللي مفروض علينا نعرفها. دة بيودينا لفكرة برمجة العقل من جديد، مش بس رفض أفكار غيره، بل التقولب داخل فكرة جمعية واحدة و بس. ‏نرجع تاني ونقول بعد استعراض النقطة الأولى عن المتاح من معلومات للبشر، والغير متاح.. نرجع ونقول هل الأمور التي تقع بشكل مفاجئ وخارج التوقعات المألوفة للأغلبية الساحقة من البشر.. هل هي أحداث بالمصادفة، أم تم التخطيط لها في حيّز ضيق جدا جدا من البشر ؟!! ‏نضرب مثل بحَدَث أو اتنين حصلوا قدام عينينا دلوقتي : 1- البريكست 2- فوز ترامب البريكست هو حدث مفاجئ كان خارج توقعات أغلب البشر، بل إن على مدار عقود من تاريخ الاتحاد الأوروبي كان غير متوقع تحديدا خروج بريطانيا، واللي كانت بتمثل أحد أهم أعمدة الاتحاد الأوروبي. السؤال : ‏هل دة حصل فجأة بدون مقدمة له ؟ زي ما كل التوقعات المألوفة قالت، إنه حدث مفاجئ غير متوقع.. الإجابة اللي يقبلها العقل هي لا. وعلى الرغم من أنه حدث مفاجئ وغير متوقع، إلا أنه كان بيجري التجهيز والتخطيط له من فترة طويلة، ولكن تخطيط وتجهيز بدون إدراك من الأغلبية العظمى من الناس. ‏وعلشان تتأكد من الإجابة، لازم تشوف بداية البريكست و أول خطواته جت منين؛ أعتقد أن أول خطوات البريكست كانت مع صعود اليمين القومي، مش بس في إنجلترا، ولكن في دول تانية ليه يعتبر أول بداية للبريكست هي صعود اليمين؟ لأن السبب الأول والمحرك الكبير للتصويت على البريكست سبب قومي بحت.. ودة تقدر تشوفه في تصريحات "تريزا ماي" ومن بعدها "بوريس جونسون"، واللي كل التصريحات كانت بتصب في اتجاه واحد؛ إن إزاي بريطانيا تبقي تابع لألمانيا في الاتحاد الأوروبي وهي كانت هزمتها مرتين في الحرب العالمية الأولى والثانية ؟ أما الأسباب الاقتصادية خلف البريكست، فهي غير منطقية بالمرة لما تيجي تحللها، بل إن هناك شبه إجماع من الخبراء الاقتصاديين ومراكز الأبحاث الاقتصادية إن خروج بريطانيا من الاتحاد الأوروبي يمثل كارثة اقتصادية عليها وعلى الاتحاد، لكن عليها هي أكتر.. ومع ذلك تم التصويت بالخروج. ‏هنا انتصرت الأفكار القومية اليمينية، حتى على المصلحة الاقتصادية للدولة. الكلام باختصار شديد طب بعد استعراض الحدث (البريكست)؛ هل كان صعود اليمين القومي اللي يعتبر السبب الرئيسي للبريكست أيضا حدث مفاجئ غير مخطط له ؟ الإجابة متروكة لك. ‏من أسباب صعود اليمين واللي مكتوب في الهامش اللي في نهاية المقال؛ تقدر تقول إن البريكست كحدث ضمن نظرية البجعة السوداء لم يكن حدث مفاجئ، بل هوحدث مخطط ليه من فترة طويلة وبالتدريج. نرجع لنظرية البجعة السوداء تاني، ونقول إن الحدث المفاجئ والخارج عن التوقعات المألوفة هو حدث مخطط له، وليس حدث عرضي وقع بدون مقدمات، وإن كانت المقدمات والتخطيطات محجوبة عن إدراك أغلب البشر نتيجة حجب كافة المعلومات المهمة، إلا أن الحدث كان متوقع الحدوث من فئة قليلة جدا، وهي التي خططت لها، وأيضا من فئة بشرية قليلة جدا صاحبة صوت خافت جدا وسط ضجيج الأصوات الضخمة للأغلبية. ‏ختاما لا شيء يحدث بالصدفة إلا في عقول المغفلين. هامش (عن صعود اليمين القومي) ‏أهم أسباب صعود قوميات (اليمين القومي المتطرف) هو كُرْه الشعوب للعولمة والاقتصاد النيوليبرالي، وأيضا موجات الهجرة.. العاملين الأول والثالث أسباب عنصرية بحتة سببها الخوف من ضياع الهوية.. أما العامل الثاني هو الخوف من فقد الوظائف. يعني عوامل صعود اليمين المتطرف عنصرية اقتصادية. ‏التاريخ بيكرر نفسه حرفيا في سنة 1929م وهي سنة الكساد الكبير، صوّت ٤٠٪ من إجمالي الأصوات في الغرب لصالح الأحزاب القومية. دة تكرر الفترة الأخيرة بعد الأزمة العالمية ٢٠٠٨م وصوّت ٣٥٪ من إجمالي الأصوات في الغرب لصالح الأحزاب اليمينية القومية المتطرفة في (ألمانيا – أمريكا – إيطاليا). ‏من اللي فات دة تقدر تقول إن نواة حرب أو سيناريو الحرب العالمية الثانية بيتكرر قدام عينيك.. إحنا شايفين : - مشاكل اقتصادية عالمية - صعود اليمين المتطرف ‏السؤال هنا : هل فعلا العالم متجه لحرب عالمية جديدة ؟ في وجهة نظري نعم. لأن موازين القوى الكبرى لازم تتغير ما بين فترة والثانية. مصالح وحياة العالم بتحتاج كل فترة من الزمن لتغيير النظام العالمي الحاكم لصالح شكل جديد لإدارة العالم، و ده تاريخيا أو نقدر نقول سُنّة كونية. مقال بتاريخ 23 مارس 2020 تم نشره علي مدونة حكايات جوكر